Eksingedalen

Nasjonaldagen kom med snø i lufta øverst i dalen, men veret kom seg utover dagen.

17. mai festen vart gjennomførd utan nedbør ute og med Jon Eikemo som talar inne.

I talen var Jon innom mange tema, som økonomisk fordeling, jordbrukspolitikk, shoppingsykje, Jens Stoltenberg og Utøya. Han sa sjølv at det vart bråe overganger i talen og samanlikna dette med variasjonane i vestlandsnaturen.

Jon Eikemo sa at talen var skrive utan tanke på at dette var barnas dag. Trass dette fulgte både gamal og ung med på talen og det var tydeleg at årets 17- mai talar var både ein god og profesjonell underhaldar.   

          Også barnehagebarna var fasinert over talen til Eikemo

.

Dagen vart ellers gjennomført på tradisjonelt vis der dravlen kom på bordet og alle aktivitetar som er forventa på skuleplassen var å finna.

Fleire bilete frå feiringa er lagt inn som eige album.

Alle dei 11 elevane på ungdomsskulen var aktive medspelarar i  Beatles-programmet. Heilt til høgre stylist og frisør Susanne Leiren og rektor og regissør Maya Mykkeltvedt. Sjølv bilen er tidsriktig, ei gamal Boble frå 60-70-talet.

Hadde ein berre kunna syngja og dansa seg gjennom livet, ville det sett lyst ut for ungdomsskuleelevane på Bergo.

Torsdag 10. mai var dagen for ”The Beatles – endeleg i Eksingedalen”. Kvar einaste av dei 11 elevane i ungdomsskulen hadde samla kreftene sine og laga ein framsyning langt ut over det som er vanleg å visa foreldre og besteforeldre på ei skuleavslutning.

Søndag 22. april vart Asbjørn Nese heidra med Kongens fortenstmedalje i sølv. Det var dei to sokneråda i dalen som meinte at Asbjørn, med god margin, hadde gjort seg fortent til ei oppmerksomheit utanom det vanlege, og difor sendte søknad til Kongen.

Eirik Haga overrekker diplom og medalje

Her skal dei få valuta for pengane, dei mange turistane som køyrer gjennom Eksingedalen i sommarhalvåret. Fossfossen mellom Lavik og Fosse har vore innpakka i frodig bjørk og tette grantre i mange år. No vert fossen og eit stort område nedanfor, med djupe juv, jettegryte og fleire fossestryk, pakka ut.

April 2012: Det lysnar. Like før påske tok grunneigarane motorsag i hand og meia ned det meste av tett skog. Berre stolpane til kraftleidningane fekk stå att. Det er ei dramatisk endring av utsikta fleire hundre meter langs vegen. Fossen vert pakka ut, til glede for alle som fredast langs vegen. 

Mandag 16.april var kommunestyret i Vaksdal på rundtur i kommunen.
Turen gjekk om Stamnes, Eidslandet, Eksingedalen og fjellet attende til Dale for kommunestyremøte.
På Ljosheim serverte Grete kortreist mat - og politikarane fekk kort informasjon om Eksingedalen og om utfordringar bygda har. Neste stopp var skulen, deretter Gullbrå. Om vegen var lang, smal, humpete  og kroketet - og det vart meir og meir vinter - var det ein blid gjeng som møtte eksingedølane denne fine "vårdagen"!
For fleire var det første gongen dei var i Eksingedalen.
At ei slik rundreise er nyttig for dei folkevalde - det er sikkert!

Flittige damer frå Eidslandet, Modalen og Eksingedalen strikkar babyhuer til nyfødde i Malawi.

Kvinne- og familielaget i Eksingedalen har i fleire år vore engasjerte i dette prosjektet - og samlar inn huer ein gong i året.

Mot siste kneika

I strålande sol på langfredagen, låg forholda godt tilrette for Eksingedalen IL sin fellestur i påska. Målet for turen var fjellet Kvitanosi. Rundt klokka 11 vart tun og vegkanter fyllt opp av biler på Gullbrå, og det gjekk etterkvart ein jamn straum med folk oppover mot fjelltoppen på 1433 moh.  LItt vind på toppen la ingen dempar på stemninga. Over 80 personar kom til topps denne fine dagen, kanskje er det ny rekord ?

LivOGLyst søknaden på med tittel "Folk til bygdene" har komme med i prekvalifisering om opptak som LivOGLyst-prosjekt. Prosjektet omfattar bygdene Eksingedalen, Eidslandet, Stamnes og Bergsdalen, og er eit samarbeid mellom bygdelaga og Vaksdal kommune. Innan kort tid vil det verta avgjort om prosjektet går vidare.

Som eit ledd i satsing på utvikling av bygdene i Vaksdal, vert det Bygdekonferanse laurdag 16.juni i Eksingedalen.
Bygdene Eksingedalen, Eidslandet, Bergsdalen og Stamnes står i fokus denne dagen.
Føremålet med konferansen er:
- Snu ei utvikling , skapa noko positivt til lokalsamfunnet
- Gje Inspirasjon og lyst til å flytta til bygdene
Konferansen er open for alle. Ungdommar frå områda får spesiell invitasjon.
Merk av datoen - program og føredragshaldarar vert kunngjort så snart det er klart.